Երկարացված օրվա գործունեություն
Հոկտեմբեր ամսվա ընթացքում երկարացված օրվա ընթացքում սովորողների հետ իրականացրել ենք բազմազան, հետաքրքիր և ինտերակտիվ գործունեություններ՝ համատեղելով խաղը, ուսուցումը, ստեղծագործական աշխատանքն ու բնության հանդեպ հոգատարությունը։
Չնայած այն հանգամանքին, որ հոկտեմբեր ամիսն էր, եղանակը բավականին տաք էր, ուստի շատ ժամանակ անցկացրել ենք բացօթյա միջավայրում։ Խաղացել ենք գործնագործ, պահմտոցի, անուն գոռոցի, ֆուտբոլ և այլ բակային խաղեր։ Տաք եղանակի շնորհիվ նաև վայելել ենք բացօթյա լողավազանում լողալու հաճույքը։
Մեր առօրյան հագեցած էր նաև ստեղծագործական և ճանաչողական գործունեությամբ։ Մեդիակենտրոնում ընկեր Մարթայի հետ մասնակցել ենք հացթխիկի հետաքրքիր աշխատանքին։ Սովորողները մեծ ոգևորությամբ պատրաստել են հացը, իսկ այնուհետև միասին վայելել իրենց իսկ ձեռքերով պատրաստված անուշաբույր հացը։ Այս աշխատանքը ոչ միայն հաճելի փորձառություն էր, այլև հնարավորություն՝ ծանոթանալու հաց պատրաստելու գործընթացին և գնահատելու սեփական աշխատանքի արդյունքը։
Այցելել ենք նաև տիկին Շողիկի ջերմոց-լաբորատորիա, որտեղ մեր շատ սիրելի տիկին Շողիկը սովորողներին ներկայացրել է հետաքրքիր տեղեկություններ բույսերի, դրանց աճի և խնամքի մասին։ Այցի ընթացքում հավաքել ենք տարբեր սերմեր, որպեսզի դրանք տանը ցանենք, խնամենք և աճեցնենք մեր սիրելի ծաղիկները։ Այս գործունեությունը նպաստել է բնության նկատմամբ հետաքրքրության ձևավորմանը, պատասխանատվության զգացման զարգացմանն ու շրջակա միջավայրի հանդեպ հոգատար վերաբերմունքի ամրապնդմանը։
Օրը շարունակել ենք Քոլեջի այգում, որտեղ հանդիպել ենք մեր սիրելի կենդանիներին՝ ծովախոզուկին և կրիային։ Սովորողները սիրով խնամել և կերակրել են նրանց՝ սովորելով ավելի ուշադիր, հոգատար և պատասխանատու լինել կենդանի արարածների նկատմամբ։
Այսպիսով, հոկտեմբեր ամիսը երկարացված օրվա ընթացքում անցել է հագեցած, ուրախ և բովանդակալից։ Խաղերի, ստեղծագործական աշխատանքների, բնաճանաչողական այցերի և կենդանիների խնամքի միջոցով սովորողները ձեռք են բերել նոր գիտելիքներ ու հմտություններ, ամրապնդել ընկերական կապերը և ունեցել բազմաթիվ անմոռանալի պահեր։
Լրամշակվում է՝ հղումները կլինի հոկտեմբերի 27-ի երեկոյան։
